இரண்டே பேர் நடித்திருக்கும் திரைப்படங்கள்

இரண்டே பேர் நடித்திருக்கும் படம்
வித்தையடி நானுனக்கு

இதே போல் இரண்டே பேர் நடித்திருக்கும் திரைப்படங்கள் எத்தனை இருக்கும் என்று கூகுளில் தேடினேன். பத்து படங்களைக் கூட பட்டியல் போட முடியவில்லை. அந்த வகையில் எங்களுக்கு ஒரு பெருமை. உலக அளவில் டாப் - 10க்குள் வந்துவிட்டோம்.

DUEL
SLEUTH
BEFORE SUNRISE
BEFORE SUNSET 
GRAVITY
ANTICHRIST
GERRY

இவையெல்லாம் இதுவரை ஆங்கிலத்தில் வெளியாகியுள்ள இரண்டே பேர் நடித்திருக்கும் திரைப்படங்கள். அந்த வரிசையில் எங்களுடைய ”வித்தையடி நானுனக்கு” திரைப்படமும் சிறப்பு கவனம் பெறுகிறது. தற்போது திரைப்படத்தை Crowd Funding முறையில் வெளியிட முயற்சி செய்து கொண்டிருக்கிறோம். விரைவில் வெள்ளித் திரையில் வித்தையடி நானுனக்கு திரைப்படத்தைக் காணலாம்.

கிரவுட் ஃபண்டிங்!

வசந்த சேனா வசந்த சேனா!
வசியம் செய்ய பிறந்தவள்தானா
நீயில்லாது நானென்ன நானா
சேனா... வசந்த சேனா!

இந்தப் பாடல் பலருக்கும் ஞாபகம் இருக்கும். ஆனால் படத்தின் பெயரைக் கேட்டால் தெரியாது. இது சூர்யா நடித்து அதிகம் பிரபலமாகாத ஸ்ரீ என்றொரு படம்.  அந்தப் படத்தின் இசையமைப்பாளர் T.S.முரளிதரன். எனது நண்பர்!

 ரோஜாவும் ஏ.ஆர்.இரகுமானும் வருவதற்கு முன், என்னிடம் ஒரு ஆடியோ கேசட் வந்தது. மெரைன் இஞ்ஜினியராக இருந்த எனது நண்பன் ஒருவன் அதைக்கொடுத்து, இதில் என் நண்பனின் டியூன்ஸ் இருக்கிறது கேட்டுப்பார் என்றான். அக்கால வழக்கமான ஆர்மோனியம், கிடார், தபேலா ஒலிகளை எதிர்பார்த்து அசட்டையாக கேசட்டை ஒலிக்கவைத்தேன். முதல் டியூன் கேட்டதுமே நான் மட்டுமல்ல, என் நண்பர்கள் கூட்டமே அசந்துவிட்டது. நாங்கள் எவரும் அதற்கு முன்பு கேட்டிராத டிஜிட்டல் இசை. புத்தம் புது ஒலிகள். அவ்வளவுதான் அன்றே அவரை நண்பராக்கிக்கொண்டேன். பல கதைகள் பேசி, பல டியூன்கள் போட்டு தற்போது அவரே ஒரு இயக்குநராகிவிட்டார்.

வித்தையடி நானுனக்கு படம் ரெடி
”அவர்” என்ற டைட்டிலுடன் ஒரு படத்தை தயாரித்து இயக்க முடிவு செய்திருந்தேன். அதற்காகவே Canon 7D மற்றும் உபகரணங்கள் வாங்கியிருந்தேன். அப்படங்களுக்கான பாடல் ஒலிப்பதிவின்போது முரளி ஒரு கதை சொன்னார். மிகக்குறைந்த பட்ஜெட்டில் உடனடியாக தயாரிக்க முடியும் என்பதையும் விளக்கினார். அதனால் சட்டென்று தைரியம் பிறந்து ”அவர்” படத்துக்கு முன் ”வித்தையடி நானுனக்கு” படத்தின் தயாரிப்பில் இறங்கி படத்தையும் தயாரித்துவிட்டோம். நான் ISR Ventures, முரளி Media Merchants. இருவரின் கூட்டுத்தயாரிப்பாக படம் ரெடி.


தயாரிப்புக்காக அல்ல - ரிலீசுக்காக Crowd Funding 
இப்போது அதன் தொடர்ச்சியாக படத்தின் ரிலீசுக்காக Crowd Funding-ல் இறங்கியுள்ளோம். முதலில் தயங்கிய என்னை முரளியின் விடாத தொடர் முயற்சி மாற்றிவிட்டது. www.indiegogo.com என்ற இணையதளத்தை ஓரிரு மாதங்கள் தொடர்ச்சியாக கவனித்தபின் இதில் நம் முயற்சியை துவக்குவோம் என்றார். இதோ.. நாங்கள் தயார்!

650 ரூபாய் போதும்
ஆளுக்கு ரூ.650.  இதுபோல 3500பேரை ஒருங்கிணைக்கலாம் என்றார். விட்டால் மீண்டும் தயங்குவேன் என்று முயற்சியை துரிதப்படுத்திவிட்டார். ”வித்தையடி நானுனக்கு” உருவாவதற்கு அவருடைய முயற்சியே காரணம். நானாவது திரைப்படம் தயார் ஆனதும், டிவி நிகழ்ச்சிகள், டாகுமென்டரிகள் என பல திசைகள் திரிந்துகொண்டிருக்கிறேன். ஆனால் முரளி தனது அவருடைய ஆர்வம் குறையால் அதிலேயே கவனமாக இருக்கிறார். அதனால் திரைப்படம் வெளியாவதற்கும் அவருடைய முயற்சிகள் நிச்சயம் வெற்றியைத்தரும் என்று நம்புகிறேன். இணை தயாரிப்பாளராக நானும் அவருடைய முயற்சி வெற்றிபெற வேண்டும் என்று மனதார விரும்புகிறேன்.

இன்றைய காலகட்டத்தில் படம் தயாரிப்பது எளிது. வெளியிடுவதுதான் கடினம். தயாரிப்புச் செலவை விட வெளியிடும் செலவு அதிகம். அதற்கு Crowd Funding உதவும் என்றுதான் தோன்றுகிறது. அதனாலேயே இந்த முயற்சி. எங்களைப்போன்ற புதிய சிறுபட்ஜெட் தயாரிப்பாளர்களும் இந்த இணையதளத்தை ஒரு முறை பார்க்கலாம், நம்பிக்கை பெறலாம்.

https://www.indiegogo.com/projects/vithaiyadi-naanunakku-tamil-feature-film

வித்தையடி நானுனக்கு பற்றிய Crowd Funding விபரங்களை இந்த இணைப்பில் காணலாம்.

கிரவுட்ஃபண்டிங் பற்றி அறிந்து கொள்ள வேண்டுமா?
கிரவுட்ஃபண்டிங் வழியாக எங்கள் திரைப்படம் ரிலீஸ் ஆவது ஒருபுறம் இருக்கட்டும். டிஜிட்டல் சினிமா பிரபலம் ஆகாத காலகட்டத்தில் ”அவர்” திரைப்படத்தின் துவக்கவிழாவையே ”டிஜிட்டல் சினிமா” பற்றிய வொர்க் ஷாப்பாகத்தான் நடத்தினோம். அதுபோல கிரவுட் ஃபண்டிங் பற்றியும் உங்களிடம் பகிர்ந்துகொள்ளத்தயார். எங்களைப் போன்ற புதிய பட்ஜெட் தயாரிப்பாளர்களுக்கு நிச்சயம் இது பற்றி கேள்விகள் இருக்கும். கிரவுட் ஃபண்டிங் என்றால் என்ன? அதன் வழியாக எவ்வளவு திரட்ட முடியும்? அது எப்படி சாத்தியமாகிறது? போன்ற கேள்விகளுக்கு பதில் சொல்ல நீங்கள் நண்பர் முரளியை அழைக்கலாம். அவருடைய எண் - 9841524590

பின் குறிப்பாக ஒரு ஃபிளாஷ்பேக்
வசந்தசேனா பாடல் வெறும் டியூனாக இருந்தபோது நான்தான் அதற்கு வரிகள் எழுதினேன்

பூவைக்கண்டேன் பூவும் ஆனாள்
நிலவைக் கண்டேன் நிலவும் ஆனாள்
கவிதை கண்டேன் கவிதை ஆனாள்
தோழி... காதல் தோழி!

வெறும் டியூனாக இருந்த பாடல் பின்னொருநாளில் திரைப்பாடலாக உருவெடுத்தது போல, முரளியின் ”வித்தையடி நானுனக்கு” படமும் திரைப்படமாக விரைவில் தியேட்டர்களின் திரையைத்தொடும் என்று நம்புகிறேன்.

அவர் - டைட்டில் டிசைன்ஸ் - உங்களுக்கு எது பிடிச்சிருக்கு?

வடபழனி ராஹத் பிளாசாவில் நான் ஒரு வெஜ் ரோலை சாப்பிட்டு முடிக்கவும், பழனிவேலு பாட்டை கேட்டு முடிக்கவும் சரியாக இருந்தது.

”பாட்டு நல்லா இருக்கு சார். குதம்பாய், மை டியர் எந்திரா, வானவில் அப்படின்னு எல்லாமே தனித்தனி வெரைட்டியா இருக்கு.  கதை எப்படி இருக்கும்னு கெஸ் பண்ண முடியல. கதை என்ன சார்?”, இது எனது நண்பர் டைட்டில் டிசைனர் பழனிவேலு

”கதையை சொல்வதற்கில்லை. வேண்டுமானால் ஒன் லைன் சொல்லுகிறேன்”, இது நான்.

”ம்ம்ம் . . .சொல்லுங்க”

”அவர் இது தான் டைட்டில். யார்? இது தான் ஒன் லைன்”

”ஹா.. ஹா.. ஹா... சார் கேட்கறதுக்கு நல்லா இருக்கு. இருந்தாலும் எனக்கு இது பத்தாது சார். இன்னும் கொஞ்சம் டீடெயில் சொல்லுங்க”

”சொல்லிட்டாப் போச்சு. வெவ்வேறு நிறங்களாக இருந்தாலும், ஒன்றாக இணையும்போது அது, அழகான வானவில்லாகிறது. அது போல வெவ்வேறு குணங்கள் உடையவர்களாக இருந்தாலும், வானவில் போல வண்ணமயமாக ஒற்றுமையாக வாழும் ஒரு குடும்பம்.”

”அப்புறம்?”

”அந்தக் குடும்பத்திற்குள் எட்டாவது நிறமாக ஒருவர் வருகிறார். அவர் எதற்க்காக வந்தார்? அவர் யார்? இது தான் முடிச்சு”

 ”ம்..ம்..ம்.. அவர் - இந்த டைட்டில் ஒரே வார்த்தையில நச்சுன்னு இருக்கு. ஆனா கொஞ்சம் வெயிட்டா இருக்கு.”

”கரெக்ட். அதனாலதான் நான் ஒரு விஷயத்தை யோசிச்சு வைச்சிருக்கேன். வானவில் ஷேடிங்கை டைட்டில்ல கொண்டு வந்துட்டா, நீ ஃபீல் பண்ற அந்த வெயிட் குறைஞ்சு பேலன்ஸ் ஆகிடும்.”

”ஓ.கே சார், இன்புட் பத்தல. இருந்தாலும் நானே ஏதாவது டிரை பண்றேன். பார்த்துட்டு சஜெஷன் சொல்லுங்க. அங்கேயிருந்து அப்படியே டிராவல் பண்ணலாம்”

கீழே இருப்பவை அவர் திரைப் படத்திற்க்காக பழனிவேலு முயற்சித்த சில டைட்டில் டிசைன்கள்.

அவர் டைட்டில் டிசைன் - 1

அவர் டைட்டில் டிசைன் - 2

அவர் டைட்டில் டிசைன் - 3

அவர் டைட்டில் டிசைன் - 4

அவர் டைட்டில் டிசைன் - 5

அவர் டைட்டில் டிசைன் - 6

பழனிவேலு மகா திறமைசாலி. நேரம் எடுப்பார். ஆனால் அபாரமான டிசைன்களைத் தருவார். எதை தேர்ந்தெடுப்பதென்று குழம்பிவிடுவோம். நானும் எனது குழுவினரும் இன்னும் எந்த முடிவும் எடுக்கவில்லை. உங்களுக்கு எது பிடித்திருக்கிறது என்று கூறுங்கள். அதிகமாக எது உங்களுக்கு பிடிக்கிறதோ, அதை மேலும் மெருகூட்டலாம் என்று முடிவு செய்திருக்கின்றேன். 


அப்புறம் . . . உலக சினிமா வரலாற்றில் முதல் முறையாக பதிவர்கள்  தேர்ந்தெடுத்த டைட்டில் டிசைன் என்று அலட்டலாமென்றிருக்கின்றேன். என்ன சொல்கிறீர்கள்?