Friday, May 11, 2012

கற்றதும் கற்பதும் (கூகுள், டின்ட், பிக் மங்கி)



கூகுளின் மேகக் கணிமை (Cloud Computing)
சென்ற வாரம் ஒரு நள்ளிரவு. நண்பர் ஒருவர் விடிவதற்குள் ஒரு க்ரீட்டிங்கார்டு வேண்டும் எனக் கேட்டார். நெருங்கிய நண்பர் என்தால் தட்டமுடியவில்லை. தூக்கத்தை தொலைத்து அவசரம் அவசரமாக ஃபோட்டோஷாப்பில் ஒரு டிசைன் செய்து அனுப்பினேன். பிறகு மறந்தே போய்விட்டேன். இரண்டு நாட்கள் கழித்துப் பார்த்தால் வேறொரு டிசைனை வைத்து க்ரீட்டிங்கார்டு தயார் செய்திருந்தார்.

நான் அனுப்பிய டிசைன் பிடிக்கவில்லையான எனக்கேட்டேன்.

அதற்கு அவர் சொன்ன பதில்தான் ஹைலைட்.
”நீ அனுப்பிய பதிலை பார்க்கவே இல்லை” என்றார்.
”ஏன்?” என்றேன்.
”ஏனென்றால் நீ அனுப்பிய ஃபோட்டோஷாப் ஃபைலை பார்க்க என்னிடம் ஃபோட்டோஷாப் இல்லை” என்றார்.

இதே அனுபவம் எனக்கு ஏற்கனவே நடந்திருக்கிறது. ஒரு கார்ப்பரேட் ஃபிலிம். ஒரு குறிப்பிட்ட காட்சியை எடிட் செய்யாமல் அப்படியே பார்க்க வேண்டும் என க்ளையண்ட் விரும்பியதால், அதை உடனடியாக உதவியாளர் வழியாக அனுப்பி வைத்து விட்டு வேறு வேலையில் மும்முரமாகிவிட்டேன். அதிகாலையில் ஃபோன். 

”சார், நீங்க அனுப்பின வீடியோவில் ஏதோ பிரச்சனை. திறக்கவே மாட்டேன்கிறது. திறந்தாலும் விட்டு விட்டு ப்ளே ஆகிறது” என்றார். 

பல்வேறு குழப்பங்கள், விளக்கங்கள் மற்றும் கோபங்களுக்குப் பின் . . . . ஹி..ஹி..ஹி... நீங்க அனுப்பினது HD வீடீயோவா... HD என் கம்ப்யூட்டரில் திறக்காதே என்றார்.

இந்த அவஸ்தைகளை இனி எளிதாக தவிர்க்கலாம். கூகுள் நிறவனம் தனது Google Docs சேவையை இன்னும் சிறப்பாக்கி (Google Drive) என்னும் புதிய ஸ்பெஷல் சேவையை தருகிறது. காதலிக்கு மேகத்தை தூதுவிடுவது போல, இனி கூகுள் (Cloud storage service) சேவையை பயன்படுத்தி குழப்ப க்ளையண்டுகளை சமாளிக்கலாம்.

இந்த தொழில்நுட்பம் மூலம் நம்முடைய கோப்புகள் ஆடியோ, வீடியோ மற்றும் டெக்ஸ்ட் உட்பட எதுவாக இருந்தாலும், இணையத்தில் சேமித்து வைக்கலாம். மேலும் நாம் எங்கு சென்றாலும் அவற்றை அங்கிருந்தே திறக்க முடியும். உதாரணத்திற்கு என் க்ளையண்ட் கேட்ட வீடியோவை கூகிள் டிரைவில் பதிவேற்றம் செய்து விடலாம். எனது க்ளையண்ட் கூகிள் டிரைவ் மூலம் தனது மொபைல்களிலோ, அல்லது கணினிகளிலோ அதனை பார்த்துக் கொள்ளலாம். HD வீடியோ ப்ளேயர் இல்லை எனப் புலம்ப வேண்டாம். ஏனென்றால் கூகுள் டிரைவ் இதனை எளிதாக ப்ளே செய்யும். ஒரு காலத்தில் யாஹீ சூட்கேஸ் என்றொரு சமாச்சாரம் இருந்தது. இப்போது இருக்கிறதா எனத் தெரியவில்லை. ஆனால் அதன் தொழில்நுட்பம் வேறு. இது மேகக் கணிமை (Cloud Computing) என்ற தொழில் நுட்பம் மூலம், எங்கிருந்தாலும் எளிதாகப் பயன்படுத்தும் வாய்ப்பு தருகிறது.

மேகக் கணிமை = Cloud Computing

இந்த மொழிபெயர்ப்பு அழகு. யார் செய்தது எனத் தெரியவில்லை. வாசித்தவுடன் மனதில் ஒட்டிக் கொண்டுவிட்டது.

சரி மீண்டும் விஷயத்திற்கு வருகிறேன். அடுத்த முறை என் நண்பரைப் போல யாராவது க்ரீட்டிங் கார்டு டிசைன் செய்து ஃபோட்டோஷாப் ஃபைலை அப்படியே கேட்டால் கூகுள் டிரைவுக்குள் போட்டு விடுங்கள். அவரிடம் ஃபோட்டோஷாப் இல்லாவிட்டாலும், டவுன்லோடு செய்யாமலேயே அவரால் பார்க்க முடியும்.

இந்த  Cloud Storage சேவையில் ஏற்கனவெ Apple, Box.net, மற்றும் Dropbox என பல்வேறு நிறுவனங்கள் வழங்கி வருகின்றன. இவற்றில்  கூகுள் டிரைவ் சிறப்பாக இருப்பதாக எனக்குத் தோன்றுகிறது.

உங்களிடம் ஜிமெயில் ஐடி இருந்தால் https://drive.google.com/ என்ற முகவரி வழியாக நீங்கள் இந்த சேவையை பயன்படுத்தி 5GB வரை இலவசமாக சேமிக்கலாம். அதற்கு மேல் என்றால் பணம் கட்ட வேண்டும்.


ஐடி என்பது டாட்டா என்ட்ரி செய்ய மட்டுமல்ல
நான் எடிட்டராகப் பொறுப்பேற்று இருக்கும் மாத்தியோசி இதழின் சார்பாக, சுற்றுச் சூழல் துறை அமைச்சர் திரு. பி.வி. ரமணா அவர்களை சந்திக்கும் வாய்ப்பு கிட்டியது. எளிமையாக, எளிமையை விட ஆர்வம், ஆர்வத்தை விட அக்கறை அதிகம் உள்ளவராக இருக்கிறார். சந்திப்புக்கு குஜராத்திலிருந்து ஒரு கன்ஸல்டன்ட் வந்திருந்தார். அவரும் ஆச்சரியப்பட்டார். பரவாயில்லயே எங்க குஜராத் மாதிரியே இங்கயும் சின்சியர் அமைச்சர்கள் உள்ளார்களே என்றார். எங்கள் குஜராத் என்றவர் ஒரு தமிழர் என்பதை அடைப்புக் குறிக்குள் போட்டுப் படிக்கவும்.

விடைபெற்று காரில் ஏறும்போது, குஜராத்தில் சாலையில் ஒரு கேபிள் போட வேண்டும் என்றால் கூட, கார்ப்பரேஷன், மின் துறை, தண்ணீர் துறை மற்றும் ஐடி துறையும் ஒரே இடத்தில் இருப்பார்கள். அனைவரும் ஒன்று கூடி பேசி முடிவெடுப்பார்கள். நெடுஞ்சாலைத் துறை சாலையை போட்டு முடித்த அடுத்தநாள், மின் துறை சாலையை துண்டிக்கும் அபத்தமெல்லாம் நடக்காது என்றார். அவர் சொன்ன லிஸ்டில் ஐடி துறையும் உள்ளதை கவனியுங்கள். ஐடி துறைதான் மற்ற துறைகள் அனைத்தையும் ஒருங்கிணைக்க உதவும் துறை. நம்ம ஊரில் ஐடி துறை சம்பாதித்து ஹவுசிங் லோன் போடுவதற்கு மட்டும்தான் பயன்படுகிறது.

சென்னை கார்ப்பரேஷனின் கால்சென்டர் சொதப்பல்!
இன்று காலையில் ஒரு செய்தி. 1913 என்பது சென்னை கார்ப்பரேஷனின் புகார் எண். தண்ணீர் குழாயில் சாக்கடை வந்தாலோ, சப்வே போல பெரிதாக பள்ளம் தோண்டிக் கிடந்தாலோ இந்த எண்ணை அழைக்கலாம். அழைத்தால் வந்து சரி செய்வார்களாம். இதெல்லாம் யாரும் அழைக்காமலே வந்து செய்ய வேண்டிய சேவைகள். இருந்தாலும் அழைத்தால்தான் வருவேன் என்ற கார்ப்பரேஷனை அணுக நீங்கள் 1913ஐ அணுக வேண்டுமாம். திருப்பதியில் வரிசை டிக்கெட் வாங்காமலேயே லட்டு கிடைக்குமா? கிடைக்காது. அது போலத்தான் இந்த நம்பரும் கிடைக்கவே கிடைக்காது. கிடைத்தாலும், நீங்கள் கேட்ட சேவை கிடைக்காது.


இதற்கு மிக முக்கிய காரணம், ஆள் பற்றாக்குறை. இவ்வ்வவ்வளவு பெரிய சென்னைக்கு நான்கே நான்கு பேர்தான் இந்த ஃபோனில் பதில் சொல்ல நியமிக்கப்பட்டிருக்கிறார்கள். ஒருவேளை அவர்கள் அவர்கள் பதில் சொன்னாலும், வடபழனியில் உள்ள ஒரு பிரச்சனையை சென்னை சென்டர் ஸ்டேஷனுக்கு அருகில் உட்கார்ந்து கொண்டு அவர்கள் எப்படி தீர்க்க முடியும். வாய்ப்பே இல்லை.

எனவே இதன் எக்ஸ்டென்ஷனாக, சென்னை நகரின் அத்தனை கார்ப்பரேஷன் அலுவலகங்களும் இணைக்கப்பட வேண்டும். அடையாறில் இருந்து ஒருவர் 1913ஐ அழைத்தால் உடனடியாக அந்த ஃபோன் பார்வர்டு செய்யப்பட்டு அடையாறுக்கு அருகில் உள்ள அலுவகலத்தை இணைக்க வேண்டும். இது சும்மா ஒரு சாம்பிள் ஐடியாதான். பரபரவென இயங்கும் கால்சென்டர்களை அமைத்துத் தர இன்று டெக்னாலஜி மிகச் சுலபமாக இருக்கிறது. மொபைல் கம்பெனிகளின் கால்சென்டர்கள் பல டெல்லி, மும்பையில் உள்ளன. ஆனால் ஈரோடு சந்திப்பில் இருந்து அழைத்தால் கூட பக்கத்துதெருவில் இருந்து பேசுவது போல நெருக்கமாகி, உங்களுக்கு பதில் sms அனுப்பி அசத்திவிடுவார்கள்.

ஆனால் நமது சென்னை கார்ப்பரேஷன் 1913 சேவையில் ஈடுபட்டிருந்த இரண்டு பேரை சஸ்பெண்டு செய்திருக்கிறார்கள். இதை டைப் பண்ணும்போது, அவர்கள் டீ குடித்துவிட்டு வந்து மீண்டும் வேலையில் சேர்ந்திருக்கக் கூடும். 1913 சேவையை திறம்பட நடத்த வேண்டுமென்றால், சஸ்பெண்டு சிறந்த வழி அல்ல. அதற்கு பதில் இந்த கால்சென்டர்கள் எப்படி இயங்குகின்றன, அதனை எப்படி நடத்துவது என்ற வகுப்புக்கு அனுப்பி வைக்கலாம்.

உங்கள் பிளாகை மற்றவர்கள் களவாடாமல் தவிர்க்க ஒரு வழி
ஒருவர் எழுதிய பிளாகை அப்படியே வரிக்கு வரி கட் அண்டு பேஸ்ட் செய்து, தனது பிளாகாக வெளியிடும் பழக்கம் அதிகரித்து வருகிறது. இதை தடுக்க முடியுமா எனத் தெரியவில்லை. ஆனால் பேஸ்ட் செய்தவரின் தளத்தில் இது உங்களிடம் இருந்துதான் சுடப்பட்டது என்பதை தெரிவிக்கும் வழி ஒன்று உள்ளது.

டின்ட் என்றொரு தளம், http://id.tynt.com 
இந்த தளத்திற்கு சென்று தேவையான விபரங்களைக் கொடுங்கள்.
அதன் பின் உங்கள் பதிவுகள் ஏதாவது களவாடப் பட்டால், கண்ணுக்குத் தெரியாமல் உங்கள் பதிவின் முகவரியை அந்தப் பதிவிலேயே இணைத்துவிடும். எனவே உங்கள் பதிவை யார் எத்தனை காப்பி எடுத்தாலும், அத்தனையும் உங்கள் தளத்தை நோக்கியே இழுத்து வரும். டிரை பண்ணுங்க.

ஆன்லைனிலேயே இமேஜ் எடிட்டிங்
சென்னைக்கு வெளியே உள்ள, வாய்ப்பு வசிதிகள் குறைவாக உள்ள மாணவர்களுக்கு சொல்லித் தர எனக்கு மிகவும் பிடிக்கும். கடந்த சில மாதங்களாக, பொன்னேரியில் வசிக்கும் நண்பர் ஒருவர் துணையுடன், அங்கிருக்கும் ஏழை மாணவர்களுக்கு ஆன் லைன் வழியாக வெப்சைட் வடிவமைப்பு, அதில் கதை, கவிதைகளை ஏற்றுதல், இமேஜ் எடிட்டிங் என சில பல வேலைகளை சொல்லித் தந்து வருகிறேன். எல்லாமே skype அல்லது கூகுள் சாட் வழியாகத்தான். மாணவர்கள் படு சுட்டிகள். பளிச்சென்று பிடித்துக் கொள்கிறார்கள்.

கடந்த வாரம் ஆன்லைனிலேயே இமேஜ் எடிட்டிங் பழகினார்கள். உதவிக்கு வந்த தளத்தின் பெயர், www.picmonkey.com - பெயரில்தான் அடங்காத குரங்கின் பெயர் இருக்கிறதே தவிர, சமர்த்தான தளம். அட்டகாசமாக ஆன்லைனிலேயே ஃபோட்டோஷாப் வேலை பார்க்கலாம்.
Post a Comment